mold.is | Gróðursetning trjáplantna
7361
single,single-post,postid-7361,single-format-standard,ajax_fade,page_not_loaded,,wpb-js-composer js-comp-ver-4.1.2,vc_responsive
 

Blog

BentM-IMG_9372

Gróðursetning trjáplantna

  |   Fróðleikur

Fyrir gróðursetningu trjáplantna er nauðsynlegt að stinga upp beð eða holu niður á 60 til 80 sentímetra dýpi. Hæfileg beðdýpi fyrir limgerðisplöntur er 60 sentímetrar og 80 sentímetrar fyrir stærri tré.

Ólíkt er eftir trjátegund hverskonar moldarblanda hentar en í langflestum tilfellum hentar Gæðamold fyrir limgerðisplöntur og allar algengar trjáplöntur.

Við gróðursetningu limgerðisplantna er hæfilegt að hafa tvær til þrjár plöntur á metra eftir grófleika þeirra og breidd beðsins á að vera 80 til 100 sentímetrar. Bil milli stofntrjáa fer eftir því hvað trén verða há og fyrirferðamikil og getur verið frá þremur til sex metrum.

Gæta skal þess að aldrei má gróðursetja tré dýpra en þau stóðu áður. Meðan á gróðursetningu stendur verður einnig að gæta þess að plönturnar verði fyrir sem minnstu hnjaski og að moldin haldist sem mest á rótunum.

Greiða skal vel úr rótunum þegar plönturnar eru settar niður og gæta þess að þær standi lóðréttar í holunni. Síðan skal moka jarðveginum að og þjappa honum varlega að rótunum. Séu tré orðin yfir einn og hálfur metri á hæð er nauðsynlegt að setja staur niður með þeim sem stuðning fyrstu árin á meðan þau eru að ræta sig og koma sér fyrir.

Eftir að plöntunni hefur verið komið fyrir á sinn stað skal vökva vel og gæta þess næstu dag að ræturnar þorni ekki.

Gróðursetja má jafnt vor eða hausti en hefð er fyrir að gróðursetja að vori, og þá eins snemma og kostur er.

Höf. Vilmundur Hansen
Vilmundur Hansen er garðyrkjufræðingur og þjóðfræðingur, hann starfaði sem verktaki í garðyrkju í mörg ár og starfar í dag sem blaðamaður og ráðgjafi í garðyrkju.
Vilmundur er höfundur bókanna Garðurinn allt árið og Árstíðirnar í garðinum.